De Schwob an dr Himmelstier

Peter Kraemer

E jeder wees, mer muss moll sterwe,
sunscht bleibt nix for unsri Erwe.
So kummt de Schwob aach eemoll d'ran
weil kenner for ewich leewe kann.

Bei der Himmelstier, do kloppt er noo,
"Mach uff, e braave Schwob is doo."
So langsam geht die Tier dann uff:
"Wu is mei Platz? Wu kheer ich hinn?
Ich kumm bestimmt in de Himmel rinn!"

De Petrus geht de Herrgott holle,
der hat de Schwob was frage wolle.
"Du hascht dei Hemm unn Hof verlore?
Im Lager bischt du ball verfrore?
Ich wees, des Lewe war der schwer.
Mer treibt eich Schwowe hinn unn her.
Wann du jetzt glaabscht ich garantier'
dir de Eintritt in die Himmelstier,
noo bischt du err, bei deiner Sach'
Soo leicht werd'dir dess nett gemach.
unn wann du wirklich glaabscht du bischt,
e anstandiger, braver, guder Chrischt,
Noo loss mich dir dess moll erklare,
Jetzt bischt bei mir, unn muscht moll here:

De Herrgott sollscht du efter loowe,
unn nett so aarch im Haus rummtoowe.
Hascht gschennt derhemm, so wie e Dunner,
kheerscht nett doo ruff, du kherscht dort nunner.
Du mennscht ich soll der jetzt verginn?
Unn willscht gleich in de Himmel rinn!
Im Fegefeier sollscht erscht soode,
dei Dickschadel erscht moll gut verbroode.
unn tuscht dann erscht tichtich schwitze,
noo werscht dich efter moll hinsitze
unn denk e bissel nooch doo driwer
soo leicht, so kummt mer nett doo riwer.
Du muscht mich efter eschtermiere,
sunnscht tuuscht dei Platz doo ganz verliere.
Jetzt geht's der korz bis an de Kraache,
Gell, dess leit nett gut im Maache?
Beim Kartespille hascht oft betrooge,
die anri Spiller noo angelooge!
Uff em Johrmarkt khandelt mit de Pherd,
die waare nett moll e Kreitzer wert!
Die Predich vumm Pharre war dir zu lang,
bischt zwischer dorch ins Wertshaus gang.
Die Hosseknepp in de Klingelbeitel werfe !
Etwas awer sollscht schunn wisse,
for dei Sinde muscht du biese.
Ich druck e Aug' moll widder zu
un loss dich jetzt moll erscht in Ruh.
Iwerleg der's jetzt unn denk moll nooch.
Wie saat mer's in deiner Mottersproch?
"Du sollscht de Herrgott immer loowe!
Dess gillt genau so, for eich Schwowe.
Ihr sollt vergesse, unn verginn,
unn doch nett immer soo dickkoppich sinn.

Ich hann e Herz, du tuuscht mer leed,
ich mach der jetz' moll e groosi Freed.
Ich kann soo lang uff dich nett warte,
Die Engle im Himmel spille aach Karte.
Soo kumm nor rinn, unn sitz dich an de Tisch,
die Karte sinn schunn langscht gemischt."